玎玎．璫璫．聽聽．看看

夏天總係要不停咁飲一D消暑嘅野，有感自己喺天氣熱嘅時候真係會放肆咁買野飲，不知不覺又浪費左好多膠杯同膠樽！唉~又對地球唔住啦...

好啦！又立定心志，自製消暑飲品，隨行隨飲，愛護愛護地球啦！

懶人宗旨係：又快又簡單又好味！今次就整「一小時酸梅湯」啦！

【材料】

【所需時間】

準備時間 10分鐘
製作時間 1小時

早前喺台北旅行時買左一D「酸梅湯」湯包，可以算係出左貓喇！哈哈！
不過亦都大大減低左我購買食材時出錯嘅機會。LOL

一包NT$60，買嘅時候老闆話係超易煲架！就睇下有幾易煲！
成包野就係得面頭一句：「用3000cc下去煮」。
我靠呢一句到底煲唔煲得成架？！=.=

為左爭取時間，就先煲落水先啦！反正D料都應該係水滾之後落架啦掛？^^"

湯包話用3000cc，我就貪心，希望可以飲多DD，所以就落定多D水，希望煲完都可以仲有3000cc飲呀嘛！哈哈~ XD

一開頭為左D水可以快D滾，就開「大火」！

等緊水滾之際，就可以拿拿聲準備湯包材料啦！

將D材料倒哂出黎！洗乾淨，然後浸水！
浸幾耐呢？其實我發現網上面真的講浸幾多分鐘都有架喎！
所以我決定按我自己嘅喜好，就係浸到5分鐘就算喇！

硬係覺得浸太耐，D味咪會落哂去D唔要嘅水度囉？^O^"

倒左水備用嘅時候，D山楂真係好香呀！

好喇！水滾落材料喇！

落完之後發現有一款梅係會沉底唔郁，所以就用湯勺搞搞佢，等佢地唔好痴底啦~

落完材料之後煲水好似又會靜左落黎咁，所以我等佢再次滾起，先轉「慢火」。

由水滾開始計，煲左大約45分鐘之後，成煲都變得紅卜卜lu！可以落糖調味啦！

落糖其實真係隨我喜好，鍾意飲幾甜都係自己先知，我就落下面隻手X2咁上下啦！

有D食譜其實會教一開頭就煮好左個糖水先，再落材料慢慢煲嘅。
但因為我實在太無經驗啦！怕自己一開頭會較唔岩味，太淡或太甜我都唔想，所以就決定採用最後15分鐘先落糖呢個辦法。^O^

我嘅做法係一次唔落太多糖。逐D落，煲溶左D糖就試下味，落到自己覺得夠甜喇，就停手。

總共煲左1小時，就可以關火喇！(我就係直接喺電磁爐較好時間掣，1小時後佢就自動熄爐！)

去到呢度，基本上「酸梅湯」就已經大功告成架啦！

不過我想飲冰鎮嘅，所以再用多少少時間搞搞佢啦！

大約用左10分鐘，將成個煲放落一盤凍水度降溫！

然後再放入樽，再放入雪櫃，等幾個鍾，就可以變成凍飲「酸梅湯」啦！！！^O^ YEAH!!!!!